【連車淑梅都搞錯】三個何嘉麗世紀會面 DJ、演員、運動員你識唔識分?

出版時間:2019/07/04 06:30



同姓三分親,若同名同姓又如何?

一個打得,是劍擊運動員;一個talk得兼唱得,是電台著名DJ及歌手;另一位最演得,曾是大台小花,擅演身世可憐少女及女警,三個都叫何嘉麗。

三個本來大纜都扯唔埋,今次在《蘋果》安排下進行「何嘉麗x3」的「世紀」會面,三個人見面時省卻自我介紹,因為大家都知道大家叫何嘉麗。

原來經常有人搞錯三個身份,包括跟DJ何嘉麗多年同事的車淑梅。

劍擊何嘉麗說:「試過一次我接到個電話,係淑梅姐打畀我,佢同我講話做facial、做body啲咁嘅嘢,我話唔好意思,我係劍擊個何嘉麗,佢話唔好意思,我係搵電台個何嘉麗。」

演員何嘉麗就曾試過被認錯而失去了一個酬勞相當可觀的登台工作。「人哋請我唱歌,我就應承,我話:『畀咁多錢我?我都係掹車邊嘅演員嚟啫!』佢當咗我係一個專業歌星。我就問你係搵電台個何嘉麗,抑或演員何嘉麗先?佢話想搵電台個何嘉麗,咁我就冇咗個job啦。」曾經留長頭髮的演員何嘉麗,笑言將頭髮剪短後,不時被認錯是電台何嘉麗。「我去做嘢,都有團體將你嘅碟攞嚟叫我簽名。因為你影嗰啲封面通常都係坐喺地下,影側面、睇唔清楚嗰啲,頭髮就一樣喇。」

DJ何嘉麗呢?「我記得有次唱卡拉OK,搵我自己啲歌嚟唱,咦?變咗何嘉莉喎。我朋友又將維基畀我睇,講何嘉麗曾經係DJ、做過歌手又做過電視演員,好似我乜嘢都係咁,唯一唔係劍擊手。」

劍擊何嘉麗家人會叫她做嘉麗,其他人則以英文名Connie稱呼。至於演員何嘉麗,家人朋友會叫她嘉嘉,跟DJ何嘉麗一樣,入行時,曾有人問她會否改名,因電台早已有個何嘉麗,但演員何嘉麗又認為沒此必要。

至於DJ何嘉麗透露初入電台時,大家會叫她英文名Susanne:「後尾做節目,啱啱Queen有首歌叫《Radio Ga Ga》,嗰時開始就叫我嘉嘉喇。我冇做電台做公關,又係叫番我Susanne,所以好多時候好清楚,知道你叫我乜嘢名,我大概乜嘢年代識嗰個人,至於啲人叫我嘉麗,就應該同我唔係好熟。」

以下就以Connie、演員嘉嘉和DJ嘉嘉稱呼三位。

三位何嘉麗其實頗有緣,三位都是60後,三個都是80年代出道。DJ嘉嘉早年在電台主持過一個《何嘉麗訪問何嘉麗》節目,先後訪問過Connie和演員嘉嘉等10幾位何嘉麗,但三個人碰頭,今次還是第一趟。DJ何嘉麗說:「我哋3個能夠坐埋一齊都幾得意囉。其實你哋鍾唔鍾意何嘉麗呢個名?」

Connie:「我鍾意喎,我有問過媽咪點解改我呢個名,佢話希望我哋屋企多樣美麗嘅嘢。」

演員嘉嘉:「我而家鍾意,以前唔係好鍾意,因為以前同學叫我歪小小音,笑我做儍瓜麗。」

一講「儍瓜麗」,三個人最有共鳴,因為三個何嘉麗都曾經有此花名,而這個花名,DJ嘉嘉說是因她而起:「呢個係我其中一個花名。係因為我,我做緊電台節目《三個小神仙》嗰時,林敏驄一見到我就叫儍瓜麗,所以就係我開始,唔好意思,對唔住兩位。」

三個何嘉麗各有成就,最打得的Connie,是香港一代劍后,曾奪亞錦賽銀牌和亞運銅牌,因為一把長髮和清秀氣質而有「體壇周慧敏」之稱,經常被邀拍廣告,代言洗頭水等產品。02年Connie退役後仍有參加比賽,前年她出戰第三屆亞洲大師劍擊賽,於女子重劍團體賽奪得銀牌,寶「劍」未老。

Connie談到自己運動員經歷:「我1986年開始學劍擊,參加暑期班,後尾打咗個比賽,贏咗之後有教練問我有冇興趣接受啲長期同有系統嘅訓練,咁就開始咗。喺我運動過程當中,都有好起伏,練習起上嚟都辛苦嘅。我唔係一個全職運動員,我有自己工作,工餘時間去練習,成日都會面對好多唔開心嘅嘢,譬如受傷各樣嘢。我係一個好鍾意比賽嘅人,好享受喺劍場上嗰種感覺,所以而家都有參加一啲age group比賽,搵番以前隊友練習。」

最演得的演員嘉嘉,讀書時曾是乒乓球校隊隊員。86年她參選無綫電視小姐入行,當過《我係黃飛鴻》等多部劇女主角,拍過《義不容情》和《刑事偵緝檔案》等極受歡迎劇集。

運動員容易受傷,演員嘉嘉表示演員亦一樣:「拍戲未必係身體上受傷,係情緒上嘅受傷。當初我出道做埋啲反派、搶人男朋友、第三者角色。嗰時做演員情緒波動好大,心理上影響得好緊要,好多演員有情緒病,都係一個受傷嚟。後期我移民去加拿大之後,發覺DJ係叫易做啲。我喺加拿大都有做廣播,而家返嚟香港就喺網上做一啲宗教廣播,人哋問我會唔會出番嚟拍劇,我覺得我完全唔會,因為自己已經去咗另一個階段。」

不過,最talk得的DJ嘉嘉,就認為DJ工作並不是室內歎冷氣咁簡單:「我哋做DJ年代唔係淨係播音,好多時都要出去做騷、做MC,其實都好辛苦,要搭台後先可以綵排,好多時踩釘,有次個騷中午之前做,我哋差唔多通宵綵排,跟住冇返屋企,等埋開騷先走,又多人,又冇得休息,企喺個台排完一次又一次,好驚個儀式錯,個人好攰同暈暈地,點知我真係撻咗喺地,真係暈。」

DJ嘉嘉82年開始在港台兼職做DJ,跟林珊珊和鄭丹瑞主持的《三個小神仙》最受歡迎,另外兩位何嘉麗坦言「細細個」開始聽她做節目。DJ嘉嘉推出多張大碟,《無可奉告》、《無情者‧有情人》和《夜溫柔》等都曾經甚hit。92年,DJ嘉嘉離開電台轉職公關,曾任九巴企業傳訊部經理。12年重返電台開咪,直至2年前退休享受人生,四處旅行,DJ嘉嘉說:「我而家係有旅無累。」

其實Connie試過做電視及電台節目主持,該算是半個圈中人,但她本人卻不認同:「我始終界別我自己係一個運動員。我試多咗唔同嘅嘢,有機會做MC,拍廣告,可以見到你哋,喺我嚟講其實係好開心同特別嘅經歷。」

Connie丈夫是前香港跨欄運動員林威強,現有教田徑運動。臨別時,演員嘉嘉建議他日一起跟Connie丈夫學田徑,惟DJ嘉嘉怕怕說:「跑步唔好預我,不過我哋可以一齊唱K喎。」

三個何嘉麗唱何嘉麗歌?有得諗喎!

採訪:戴彩煥
攝影:仇志德、仇志中
攝錄:林德雄、馮嘉銘

-----------------------------
7月4日起 《蘋果動新聞》只限升級壹會員閱覽
繼續撐蘋果!

(攝影:仇志德、仇志中)
(攝影:仇志德、仇志中)

 DJ何嘉麗做節目外,也不時為電影配音。
DJ何嘉麗做節目外,也不時為電影配音。

 兩個何嘉麗較量。
兩個何嘉麗較量。

  三個何嘉麗世紀碰面。
三個何嘉麗世紀碰面。

  劍擊何嘉麗是三人中最年輕,DJ何嘉麗最年長。
劍擊何嘉麗是三人中最年輕,DJ何嘉麗最年長。

 DJ何嘉麗(中)曾訪問劍擊何嘉麗和演員何嘉麗。
DJ何嘉麗(中)曾訪問劍擊何嘉麗和演員何嘉麗。

 《義不容情》中的何嘉麗。(TVB截圖)
《義不容情》中的何嘉麗。(TVB截圖)

 經常有人將三個何嘉麗搞錯。
經常有人將三個何嘉麗搞錯。

 演員何嘉麗當年樣子相當甜美。(網上截圖)
演員何嘉麗當年樣子相當甜美。(網上截圖)

 《三個小神仙》的何嘉麗(中)。(資料圖片)
《三個小神仙》的何嘉麗(中)。(資料圖片)

  演員何嘉麗未考慮復出拍戲。(攝影:仇志德、仇志中)
演員何嘉麗未考慮復出拍戲。(攝影:仇志德、仇志中)

 何嘉麗曾選電視小姐。(資料圖片)
何嘉麗曾選電視小姐。(資料圖片)

 DJ何嘉麗曾推出過不少唱片。(資料圖片)
DJ何嘉麗曾推出過不少唱片。(資料圖片)

  DJ何嘉麗曾於九巴擔任傳訊工作面對傳媒。(資料圖片)
DJ何嘉麗曾於九巴擔任傳訊工作面對傳媒。(資料圖片)

  Connie曾被封「體壇周慧敏」。(受訪者圖片提供)
Connie曾被封「體壇周慧敏」。(受訪者圖片提供)

97年 Connie 於世錦賽奪銀牌。(受訪者圖片提供)
97年 Connie 於世錦賽奪銀牌。(受訪者圖片提供)

 02年亞運與隊友奪團體賽銅牌。 (受訪者圖片提供)
02年亞運與隊友奪團體賽銅牌。 (受訪者圖片提供)

Connie 與丈夫林威強結婚多年恩愛非常。(受訪者圖片提供)
Connie 與丈夫林威強結婚多年恩愛非常。(受訪者圖片提供)

  三人說到被搞錯身份事件時笑唔停。
三人說到被搞錯身份事件時笑唔停。

 何嘉麗訪問何嘉麗。
何嘉麗訪問何嘉麗。

 三人大唔透。
三人大唔透。

  劍擊何嘉麗型到爆。
劍擊何嘉麗型到爆。

下載「蘋果新聞網APP


有話要說 投稿「即時論壇」