【來自破碎家庭】何嘉麗獲韋家輝選中拍《義不容情》:我都似一個被遺棄嘅人

出版時間:2019/07/04 06:30



「韋家輝聽完我家庭故事之後,覺得我好適合做《義不容情》個角色,所以佢即刻畀我做。」何嘉麗日前接受《蘋果》專訪時說。

89年黃日華和溫兆倫主演的無綫劇《義不容情》,去年底深宵重播再掀熱潮。雲姨(蘇杏璇)收養的4子女來自3個不同破碎家庭,何嘉麗跟劇中飾演的三女陳少玲,都是被遺棄。

「《義不容情》裏面被遺棄,跟住璇姐(蘇杏璇)執我哋返嚟養;其實我爸爸媽媽係同居,佢哋年紀輕,對婚姻唔係咁認識,所以時常嘈交,家暴家庭,總之我眼見爸爸媽媽一係唔傾偈,一傾就大打出手,我妹妹讀中三就俾爸爸趕出門口,以後佢冇返過呢個屋企,媽媽帶住細佬喺我讀中四時搬咗出去住,惟獨唔帶我走,就係因為佢覺得我個樣似爸爸,所以佢見到我就唔鍾意。我爸爸本身性格比較暴躁,或者佢工作唔係幾開心、壓力大,佢都唔同我傾偈,到我讀完書,佢話佢責任完咗,感覺上我都好似一個被遺棄嘅人。」

何嘉麗當日是第5個試鏡,向《義不容情》監製韋家輝講完自己的故事後,韋家輝選了她。

《義不容情》個個好戲,一班演員合作得十分開心,除了何嘉麗。

「我覺得我虧欠其他演員,個個都好好,惟獨我自己因為屋企影響自己唔開心,所以我好少同佢哋一齊食飯,放食飯一家人一齊食,但我偏偏冇同佢哋食,所以到最後佢哋都問我:『你係咪有傳染病呀?點解成套劇都唔同我食飯?』其實我唔知點同佢哋傾偈,佢哋太好人,我未試過喺咁好人嘅家庭裏邊,我有啲驚,唔識點同佢哋溝通,但佢哋對我好好,好錫我,拍嘅過程,唔係好覺得我哋拍戲,我哋真係好似一家人,只不過我唔識表達。講真,其實嗰套戲就係咁吖嘛。個個被遺棄,我都係被遺棄嘅一個女,璇姐對我好惡,正正好似爸爸對我好惡咁。我咪做番我自己。」

其實何嘉麗從小志願是當警察,起碼鐵飯碗,可以養活自己,但試過投考卻不獲取錄。後來她在修讀的「小太陽自我認識課程」班主任倪秉郎鼓勵下選電視小姐,結果得了第5名,展開星途。

何嘉麗第一部作品,是《新紮師兄1988》演媽媽生,初出道多被派演性格反叛和倔強角色,後期才多做正派的CID,包括《刑事偵緝檔案》。

「嗰陣我時常去教會分享一啲自己個人故事,分享完之後有個女士走埋嚟話我喺《刑事偵緝檔案》做CID做得好似、好好。其實我以前志願係考警察,但考唔到,原來佢係個madam,佢話你而家去考啦,去考輔警,我問:『我得咩?』佢話你得,咁我就去考喇。嗰時考輔警其實幾艱難,因為嗰時啱啱開始拍《刑偵II》,我哋啲通告唔可以固定時間返學,但輔警training唔可以遲到早退,唔可以唔返,如果唔係即刻革走,我嗰時係硬住頭皮同監製同PA傾,可唔可以到時到候放我,冥冥中真係有安排。」

何嘉麗指宗教令自己改變,89年返藝人之家,整個人心態也改變過來。

「唔係我要爬幾高、搵幾多錢,而係要有一個關係嘅愛,呢個信仰係講愛嘅,我問我自己要乜嘢,其實我嗰時拍緊《義不容情》同埋《天涯歌女》,公司畀好多機會我,訓練班同學都好羨慕我咁多戲拍,但我係最唔開心嘅,好孤單,忙到有時病,喺屋企係冇人理。」說話至此,何嘉麗忍不住落淚。

「喺嗰個階段,我係迷失嘅……真愛喺我所信嘅上帝搵到。你搵到呢份愛,我清楚乜嘢叫真愛時,我真係有呢個能力主動去搵返我屋企人,主動同我妹妹、媽媽、細佬和好,同佢哋講對唔住。」

何嘉麗說妹妹被父親趕走後到了澳門工作,多年後忽然要回家與她生活。「我住屋邨,得我一個人住,佢要返屋企住,我妹妹返嚟時已經變咗鍾意食煙、講粗口,晚晚打麻雀,變咗第二個人,嗰時我拍緊《義不容情》,凌晨2點幾放工,返到屋企3點幾4點,跟住06通告,佢仲喺度打緊麻雀,我直頭唔識點去愛佢,當我同妹妹鬧咬要趕佢走,我開始反思我自己,其實我好想愛我身邊嘅人,但愛係乜嘢呢,愛係要接納……所以我同妹妹道歉,我真係好想愛佢。」

某一年母親節,何嘉麗主動送花和母親節卡給媽咪,甚至走上媽咪家攬住媽咪說:「媽媽,我真係好愛你。」就這樣,一家人關係逐漸和好。約20年前,何嘉麗結婚並隨丈夫移民加拿大,從此退出娛樂圈。她說因為父母婚姻如此,令她要努力維繫一段婚姻,全身而退。她說:「婚姻係要努力經營。」

採訪:戴彩煥
攝影:仇志德
攝錄:林德雄、馮嘉銘

-----------------------------
7月4日起 《蘋果動新聞》只限升級壹會員閱覽
繼續撐蘋果!


《義不容情》中何嘉麗見到養母蘇杏璇現身自己的藝員畢業禮時大為感動。(TVB截圖)
《義不容情》中何嘉麗見到養母蘇杏璇現身自己的藝員畢業禮時大為感動。(TVB截圖)

何嘉麗是《我係黃飛鴻》女主角之一。 (TVB劇照)
何嘉麗是《我係黃飛鴻》女主角之一。 (TVB劇照)

  何嘉麗指當年自己曾經迷失。(攝影:仇志德)
何嘉麗指當年自己曾經迷失。(攝影:仇志德)

  何嘉麗想起當年遭家人遺棄感觸落淚。(攝影:仇志德)
何嘉麗想起當年遭家人遺棄感觸落淚。(攝影:仇志德)

《刑事偵緝檔案》演CID。(TVB劇照)
《刑事偵緝檔案》演CID。(TVB劇照)

  何嘉麗平時會騎電單車出入。(攝影:仇志德)
何嘉麗平時會騎電單車出入。(攝影:仇志德)

 當年受無綫重用,經常劇接劇。(資料圖片)
當年受無綫重用,經常劇接劇。(資料圖片)

《我係黃飛鴻》 中跟郭富城合作。(TVB劇照)
《我係黃飛鴻》 中跟郭富城合作。(TVB劇照)

昔日經常演女警。 (網上截圖)
昔日經常演女警。 (網上截圖)

 蘇杏璇《義不容情》中演何嘉麗養母。(TVB截圖)
蘇杏璇《義不容情》中演何嘉麗養母。(TVB截圖)

下載「蘋果新聞網APP


有話要說 投稿「即時論壇」