【李八方online】西環吹雞動員 叫鄉事派反連儂牆

出版時間:2019/07/12 18:46



中聯辦主任王志民噚日先至話中央堅持支持特首林鄭月娥「繼續依法有效施政」,點樣「有效」法?學嘢啦!中聯辦新界工作部部長李薊貽即日就落柯打,叫元朗人唔好畀人搞連儂牆。連一幅貼memo紙嘅牆都驚,呢個政權究竟虛怯成點?

是咁的,十八鄉鄉事委員會噚日搞就職禮,當然唔少鄉事派都畀面出席。據知情者講,呢次同以往唔同,好多元朗以外嘅鄉事派都有現身,遠到西貢、離島都有,此外,平時呢啲場合,西環都係派啲副部長、處長等級數嘅人出席就算,但噚日係新界工作部部長李薊貽親自出馬。

知情者話,李薊貽致詞嗰陣大部份時間都係照稿讀,但講講吓就唔跟稿,話聽到近日有人喺元朗搞連儂牆,佢相信元朗嘅居民一定唔會畀示威者去元朗搞事嘅。知情者形容,李薊貽嘅講法同落「動員令」無乜分別。老老實實,連儂牆只係表達吓意見啫,連意見都接受唔到,就唔好再講話要做好溝通啦。

-----------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9

下載「蘋果新聞網APP


有話要說 投稿「即時論壇」