【禁酒令彈出彈入】《古惑仔》烏鴉摑林鄭一巴 張耀揚飲酒罩不離口 安全又衛生

【禁酒令彈出彈入】《古惑仔》烏鴉摑林鄭一巴 張耀揚飲酒罩不離口 安全又衛生

出版時間:2020/03/28 07:01



林鄭月娥再次話畀香港人知,佢係幾咁神奇、頂級、超卓。早前話由湖北返港嘅人可以不戴手帶、不測試、不送隔離營,但竟然認為禁酒係防止武漢肺炎病毒傳播的可行辦法,點知昨日又話唔實行「禁酒」,彈出彈入做法真係令人「嘖嘖稱奇」!睇睇人哋《古惑仔》東星烏鴉張耀揚啦,其實飲酒都可以飲得好安全、衛生㗎:全程戴口罩,飲嗰時抆低,飲完咪戴返好囉。年年考第一喎!



《古惑仔》中的東星烏鴉,大癲大喪又相當兇殘,糟質細細粒黎姿嗰幕,真係記憶猶新。之但係見過佢真人,就會發現其實佢行為舉止都幾斯文,而且武肺肆虐下仲相當小心謹慎,就好似日前,《壹》仔見到佢戴好口罩包到實,坐喺餐廳戶外座位,面前整整齊齊排好晒酒杯,身邊有個環保袋,斷估都係帶咗私伙靚酒嚟飲返杯。

佢唔係一支公㗎,身邊仲坐咗兩位朋友。人哋就一早除晒罩肩並肩傾密偈,張耀揚呢?佢好小心,坐開啲,保持最少1.5米距離,而且口罩未除過。

太陽逐漸西沉,嚟聚餐嘅朋友亦陸續現身,包括吳啟華,據知他今次返港是拍大台劇《飛虎II》,但因疫情影響要延至五月才開工。至於其他人,一到埗一坐低就即刻除罩,唯獨張耀揚和吳啟華,安全至上!就算有朋友坐埋身邊吹水,張耀揚依然keep住隔開一個身位,最多電話有嘢開心share時先挨個身埋去,分享完又坐返開。

林鄭月娥政府早前宣布有意研究實施「禁酒令」,話飲酒要除口罩,飲醉少少又會有親密行為,增加武漢肺炎交叉感染風險喎。嗱,唔知係咪佢有咩親身經歷,飲醉少少就「曳曳」啦,亦都唔想知,但就咪一竹篙打一船人,起碼張耀揚飲酒相當自律衛生,正正係個摑林鄭一巴嘅好例子!人哋無論斟酒、飲酒,都係罩不離口,直到杯酒隊到埋口,先至抆低個口罩,飲完又戴返好。

唔只飲酒,連食雪茄都係咁。有朋友帶咗雪茄嚟一齊歎,張耀揚都係吸一啖先除一除口罩,爽完又戴返,直到下一啖,一啲都唔嫌麻煩。相反,其他朋友例如吳啟華,嫌戴住口罩飲酒吹水唔方便,早就除咗啦。

其實都明白張耀揚對戴口罩嗰份堅持同執著嘅,話晒2008年時經歷椎間盤脫開,辛苦到佢生不如死,更有諗過一走了之,後來做手術先能夠減輕痛楚,自此佢開始日日運動鍛鍊身體,相當注重健康。

可惜入夜後大家坐低圍埋一齊食飯,張耀揚焗住除口罩啦,無計!不過公筷就肯肯定要用。望真啲,原來飯桌之上,仲有先前出席過撐警無罩宴的盧惠光以及斷水流林國斌。林國斌小心咗好多呀,一樣用公筷,話晒已經59歲,對龍鳳胎仲細,應該未夠秤讀幼稚園,穩陣啲好。


----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤

下載「蘋果新聞網APP


有話要說 投稿「即時論壇」