【禁忌之林】國安法?Trump笑了|林忌

【禁忌之林】國安法?Trump笑了|林忌

出版時間:2020/05/22 11:15



有咩比起一場戰爭,能夠轉移國內焦頭爛額嘅疫情視線,令國民團結一致,支持政府?

有咩比起一場戰爭,能夠轉移內部矛盾嘅問題,令民望向下嘅總統支持度止跌,甚至贏出選舉?

就係戰爭──1997年有部荷里活電影叫 Wag the Dog,香港譯做「作大英雄」,主演陣容星光熠熠,包括影帝羅拔迪尼路、德斯汀荷夫曼,內容就係諷刺美國總統克林頓嘅性醜聞,卻利用特技拍攝一場所謂對阿爾巴尼亞嘅戰爭,現實根本從來沒有發生,卻成功用來團結國民贏得戰爭,順帶贏出總統選舉,內容,是否似曾相識?

2003年美國總統小布殊,與英國首相貝理雅出兵伊拉克,被人笑左好多年講大話,話當年所謂伊拉克收埋嘅「大殺傷力武器」根本從來都未存在過;結果點樣呢?小布殊以及貝理雅,都成功連任,因此對民主國家來講,借邪惡嘅外力來轉移人民視線,絕對唔止係電影橋段,呢招絕對係 work。

返到來2020年嘅地球,當中共日日指控美國政府抹黑中國,指控 Trump歧視中國人,屈各國追查武漢肺炎問題,係為了轉移國內無能嘅視線;但講完,卻好似自己都唔信邪咁,唔係克制自己,竟然選擇送一張香港牌畀 Trump打;畀你係 Donald Trump,你畀咩反應佢好?比起以往「送中條例」、DQ、或者人大831落閘,你睇 Trump 反應幾快?幾個鐘就出來講:「如中國在香港實施國安法,美國將作強烈回應」。

的確香港有班 Trump Fans,成日把 Trump 吹到天花龍鳳;又有班好鍾意幻想,成日叫美國出兵香港;之但係今次同以前係好唔同,第一,美國總統親自應機;第二,佢上星期才警告過中國,話最嚴重不惜與中國斷交;第三,佢在國內疫情焦頭爛額,貿易戰又收唔到科,國內選情又下挫;第四,在武漢肺炎問題話要追究中國,又被人質疑佢轉移視線…….

但家下美國民主黨又可以點應機?向中國投降?向中國屈膝?人權牌喎,有得唔制裁中國咩?甚至有得唔對中國強硬咩?

當然,美國制裁可能都冇用,中國照樣霸王硬上弓;中共在香港嘅魔掌在香港最大,美國能夠做到嘅事情有限,但係倒返轉,美國仲有一張牌,就係台灣牌,而上星期 Trump 已經暗示過,就係「不惜斷交」。

有乜野可以站在道義立場,然後激到中國發癲?又有乜野可以令中國發癲,美國又企在道德高地,然後迫中國做些蠢事,再幫助 Trump 挑一場戰爭──即使係局部嘅戰爭?

就係美國承認台灣政府,與台灣建交;咁中國可以點回應? 1. 與美國斷交?多謝晒,你幫 Trump 解決了問題 2. 打台灣?多謝晒,你都幫 Trump 解決左問題,而中國最少在 2020年係唔會打得贏美國 3. 其他報復?中國仲有咩牌打?倒轉習總如果「不敢打」,佢又頂得住自己國內班好戰友,包括早就想取佢而代之嘅其他山頭壓力嗎?

只要美國承認台灣政府,中國就會跳制,就會自亂陣腳,甚至會主動開戰──然後佢就會贏出選舉;如果你相信 Trump 係冇底線嘅狂人,如果你相信 Trump 有機會輸,有咩簡單直接得過,只要承認台灣政府,就可以直接得到中國幫佢「助選」?

諗出「國安法」呢條屎坑橋嘅,絕對係「天才」──天生嘅蠢才!


----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!

下載「蘋果新聞網APP


有話要說 投稿「即時論壇」