【傳患糖尿暴瘦】68歲洪金寶戒澱粉質減走十幾磅:想有150歲命,焗住做啦

【傳患糖尿暴瘦】68歲洪金寶戒澱粉質減走十幾磅:想有150歲命,焗住做啦

出版時間:2020/05/30 00:01



譚詠麟早前同洪金寶飯聚,並將合照上傳到微博。網民睇到之後相當驚訝:「乜大哥大瘦咗咁多呀!」紛紛表示擔心佢健康狀況。

其實《壹》仔上月見到洪金寶現身,當時塊面已經清減咗,但無瘦得咁誇張,於是聯絡佢傾兩句。直言要控制血糖嘅佢,話只係嚴控飲食成功減磅:「其實我都係差唔多啫,一路落嚟都係瘦十幾磅啫嘛。因為食嘢規律,係唔可以食澱粉質,每日喺八小時之內食完一餐,之後唔好再食嘢。」



68歲洪金寶早排帶住傭人去買餸,照舊小心翼翼,戴足兩個口罩。從身形睇,都係頂住個招牌大肚腩,同以前無乜大分別。不過,當佢上咗車除低口罩露出真面目後,唔難發現塊面的確少咗幾兩肉,無咗飽滿面珠墩撐住,面皮都有少少下垂。估唔到嘅係,短短一個月後,洪金寶再瘦多兩個碼,由譚詠麟上載嘅合照睇得出,佢瘦到塊面都拉長埋,雙下巴亦唔見咗,反而有返條頸。但原來,由磅數嚟睇,佢話其實只係減咗十幾磅,仲未跌穿二百。

洪金寶減肥,主要靠控制飲食,之前仲會食下餅乾充饑,而家唔食,瘦得更快,佢話:「因為食嘢規律,係唔可以食澱粉質,每日喺八小時之內食完一餐,之後唔好再食嘢。其實咩都食得,剩係唔食得澱粉質嘅嘢。」

亞洲人唔可以無米落肚,據聞洪金寶都係個「飯桶」,後生時最勁一餐食9碗飯,而家唔食得澱粉質咪好無癮?佢話:「無癮都無辦法,又想自己有150歲命,焗住要做啦。最緊要就係身體健康,呢樣嘢最重要,我覺得人乜都假嘅,最緊要身體健康,你有錢同無錢係另一樣嘢嚟。我就嚟70歲,而家每日只希望一家人喺度食飯就最開心。」難怪就算撐住拐杖,佢依然落手落腳去街市買魚又買肉,為嘅就係煮餐好餸畀屋企人。

為咗多啲時間聚天倫,洪金寶近年特別重視身體健康,尤其近年傳佢患有糖尿病,加上膝頭哥軟骨組織受損,2017年入院接受完手術後一度需要坐輪椅,行返之後又要拐杖借力,行動力受影響係其次,抱兩個孫有難度先係重點!所以先決心減肥。

洪金寶仲話,招呼譚詠麟呢啲朋友嚟屋企食飯嘅次數愈來愈少:「耐唔耐有啲朋友兩三個食係OK嘅,原則上我係鍾意朋友嘅,但係第一自己年紀問題,第二我招呼係好辛苦,所以第二仔、第三仔結婚,我話最好你哋旅行結婚,唔好喺香港擺酒,擺酒就X街喇我話。擺酒呢,你老竇就好似酒店、酒家嘅經理企喺門口,每個客人都『歡迎歡迎』。由開始一路企喺酒店度直到散Band,幾辛苦呀!就係洪天明結婚嗰日我做完之後,以後唔好喇大佬,我情願畀錢你哋去旅遊結婚。」

體力精神不如前,問到老婆仔女有冇勸佢退下火線,洪金寶話:「拍戲睇下點啦,因為我而家唔係自己打呀、滾呀,係差好遠㗎喇。做導演嗰啲,自己會睇住自己體力,應該無問題。退下火線呢樣嘢,我覺得上天畀你嘅資源,你又郁得、傾得、諗得、講得,咁咪盡量去做囉,如果唔係上天畀你呢啲做乜嘢吖?即係咁樣。」

攝錄:吳斯金、蕭敬漁

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!

下載「蘋果新聞網APP


有話要說 投稿「即時論壇」